ഉപതെരഞ്ഞെടുപ്പിലെ സ്ഥാനാര്‍ഥികളെ നോക്കി രാഷ്ട്രീയ നിലപാട് സ്വീകരിക്കേണ്ട സാഹചര്യം നിലമ്പൂരിലില്ല. രാഷ്ട്രീയ അവഗണനയുടെയും വികസന മുരടിപ്പിന്റെയും കണക്കുകള്‍ നിരത്തി സമുദായ - രാഷ്ട്രീയ നേതൃത്വം രാഷ്ട്രീയ അജണ്ട തയ്യാറാക്കേണ്ടതുണ്ട്.
സാമൂഹികമായും വിദ്യാഭ്യാസപരമായും ഉള്ള പിന്നാക്കാവസ്ഥ മലപ്പുറം ജില്ലയില്‍ ഏറ്റവും പ്രകടമായ ഇടമാണ് നിലമ്പൂര്‍. പശ്ചാത്തല സൗകര്യങ്ങളിലും സാമൂഹിക വികസനത്തിലും നിലമ്പൂര്‍ ഏറ്റവും പിന്നാക്കം നില്ക്കുന്നു. തമിഴ്നാടുമായി അതിര്‍ത്തി പങ്കിടുന്ന വഴിക്കടവ്, വയനാടുമായി വനാതിര്‍ത്തി പങ്കിടുന്ന പോത്തുകല്‍, എടക്കര, മൂത്തേടം, കരുളായി, ചുങ്കത്തറ, അമരമ്പലം ഗ്രാമപഞ്ചായത്തുകളും നിലമ്പൂര്‍ നഗരസഭയും ചേര്‍ന്നതാണ് നിലമ്പൂര്‍ നിയമസഭാ മണ്ഡലം.