സ്വാലിഹ്: ഗസ്സയുടെ ശബ്ദം, പ്രതിരോധത്തിന്റെ പാഠപുസ്തകം

'ശഹീദായി മണിക്കൂറുകള്‍ക്കുള്ളില്‍ പാഠപുസ്തകമായി മാറിയ സ്വാലിഹ് ജഅഫ്രാവി' എന്ന ഒറ്റവരി പ്രയോഗം, ഫലസ്തീനിയന്‍ പത്രപ്രവര്‍ത്തകന്‍ സ്വാലിഹ് അല്‍ ജഅഫ്രാവിയുടെ ജീവിതത്തിന്റെയും ദൗത്യത്തിന്റെയും തീവ്രത അടയാളപ്പെടുത്തുന്നു. തുനീഷ്യന്‍ സ്‌കൂളിലെ പാഠ്യപദ്ധതിയില്‍ അദ്ദേഹത്തിന്റെ ധീരമായ ജീവിതം ഉള്‍പ്പെടുത്തിയെന്ന വാര്‍ത്ത, ഒരു വ്യക്തിയുടെ ശബ്ദം എങ്ങനെ ഒരു ജനതയുടെ മൊത്തം പ്രതിരോധ ചരിത്രമായി മാറുന്നു എന്നതിന്റെ ഉത്തമ ഉദാഹരണമാണ്.

ദൗത്യത്തിന്റെ ആരംഭം

1997 നവംബര്‍ 22-ന് ഗസ്സ സിറ്റിയില്‍ ജനിച്ച സ്വാലിഹ്, ചെറുപ്പം മുതലേ തന്റെ ചുറ്റും നടക്കുന്ന സംഭവങ്ങളെ നിരീക്ഷിച്ചു കൊണ്ടാണ് വളര്‍ന്നത്. ഗസ്സ ഇസ്‌ലാമിക് യൂനിവേഴ്സിറ്റിയില്‍ നിന്ന് 2019-ല്‍ മീഡിയയിലും ജേണലിസത്തിലും ബിരുദം നേടിയതോടെയാണ് അദ്ദേഹം തന്റെ ദൗത്യത്തിലേക്ക് തിരിയുന്നത്. കേവലം ഒരു ബിരുദമായിരുന്നില്ല അത്, ഫലസ്തീന്റെ ദുരിതങ്ങളെ ലോകത്തിന് മുന്നില്‍ തുറന്നുകാട്ടാനുള്ള ടൂള്‍ ആയിരുന്നു.

2018-ലെ 'ഗ്രേറ്റ് മാര്‍ച്ച് ഓഫ് റിട്ടേണ്‍' പ്രക്ഷോഭസമയത്താണ് സ്വാലിഹ് തന്റെ പ്രൊഫഷനല്‍ ജീവിതം ആരംഭിക്കുന്നത്. ഒരു ഫ്രീലാന്‍സ് പത്രപ്രവര്‍ത്തകന്‍ എന്ന നിലയിലും, സോഷ്യല്‍ മീഡിയ പ്ലാറ്റ്ഫോമുകളിലെ ഉള്ളടക്ക നിര്‍മാതാവ് എന്ന നിലയിലും അദ്ദേഹം സജീവമായി. മുഖ്യധാരാ മാധ്യമങ്ങളുടെ കണ്ണെത്താത്ത പല ദുരിതക്കാഴ്ചകളും അദ്ദേഹം ക്യാമറയിലൂടെയും വാക്കുകളിലൂടെയും രേഖപ്പെടുത്തി.

ഗസ്സയുടെ മുന്‍നിര ശബ്ദം

സ്വാലിഹ് അല്‍ ജഅഫ്രാവി ശ്രദ്ധേയനാകുന്നത് സമീപകാല ഗസ്സ ആക്രമണസമയത്താണ്. ബോംബാക്രമണങ്ങള്‍ക്കിടയിലും, ഭയരഹിതനായി അദ്ദേഹം റിപ്പോര്‍ട്ടിങ്ങിന്റെ മുന്‍നിരയില്‍ നിലയുറപ്പിച്ചു. അദ്ദേഹത്തിന്റെ വീഡിയോ റിപ്പോര്‍ട്ടുകള്‍ ഫലസ്തീനിലെ യാഥാര്‍ഥ്യങ്ങളെ, അതിന്റെ എല്ലാ വേദനയോടും തീവ്രതയോടും കൂടി ലോകത്തിന് മുന്നില്‍ അവതരിപ്പിച്ചു.

മൊബൈല്‍ ഫോണ്‍ ക്യാമറയും സോഷ്യല്‍ മീഡിയ പ്ലാറ്റ്ഫോമുകളും അദ്ദേഹത്തിന് ലക്ഷക്കണക്കിന് ആളുകളിലേക്ക് എത്താനുള്ള വഴിയൊരുക്കി. അദ്ദേഹത്തിന്റെ ചില റിപ്പോര്‍ട്ടുകള്‍ 51 ദശലക്ഷത്തിലധികം കാഴ്ചക്കാരെ നേടി. ഗസ്സയിലെ സാധാരണ ജനങ്ങളുടെ ദുരിതം, അതിജീവനം, നഷ്ടങ്ങള്‍ എന്നിവയെല്ലാം അദ്ദേഹം, ലോകത്തിന്റെ പൊതുബോധത്തിലേക്ക് കൊണ്ടുവന്നു.

അദ്ദേഹം സാധാരണ പത്രപ്രവര്‍ത്തകനായിരുന്നില്ല; തന്റെ ജനതയുടെ വികാരങ്ങളെ സംഗീതത്തിലൂടെയും കവിതകളിലൂടെയും അവതരിപ്പിച്ച പൗരപത്രപ്രവര്‍ത്തകന്‍ (Citizen Journalist) കൂടിയായിരുന്നു. ഇത് അദ്ദേഹത്തിന്റെ സന്ദേശങ്ങള്‍ക്ക് വൈകാരികമായ ഒരടുപ്പം നല്‍കി.

വെല്ലുവിളികളും പ്രതിരോധവും

സ്വാലിഹിന്റെ റിപ്പോര്‍ട്ടുകള്‍ക്ക് വലിയ ജനപിന്തുണ ലഭിച്ചപ്പോള്‍ തന്നെ, അദ്ദേഹത്തിനെതിരെ നിശിതമായ പ്രചാരണങ്ങളും ഉണ്ടായി. ഇസ്രായേല്‍ അനുകൂല വൃത്തങ്ങള്‍ അദ്ദേഹത്തിന്റെ റിപ്പോര്‍ട്ടുകളെ 'പാലിവുഡ്' (Pallywood) എന്ന് മുദ്രകുത്തി തള്ളിക്കളയാന്‍ ശ്രമിച്ചു. 'ദുരന്തങ്ങളെ പ്രശസ്തിക്കായി ചൂഷണം ചെയ്യുന്നയാള്‍' എന്നും ആക്ഷേപിക്കപ്പെട്ടു.

എങ്കിലും, സത്യം തേടുന്ന അന്താരാഷ്ട്ര മാധ്യമപ്രവര്‍ത്തകര്‍ അദ്ദേഹത്തിന്റെ ആത്മാര്‍ഥത ഉയര്‍ത്തിപ്പിടിച്ചു. ഈ ആരോപണങ്ങള്‍ക്കിടയിലും, അദ്ദേഹം ദൗത്യത്തില്‍ നിന്ന് പിന്മാറിയില്ല, കാരണം അദ്ദേഹം വഹിച്ചത് തന്റെ ജനതയുടെ ശബ്ദമായിരുന്നു.

വീരമൃത്യുവും പൈതൃകവും

2025 ഒക്ടോബര്‍ 12-ന്, ഗസ്സ സിറ്റിയിലെ സബ്ര പ്രദേശത്ത് നടന്ന സംഘര്‍ഷങ്ങള്‍ റിപ്പോര്‍ട്ട് ചെയ്യുന്നതിനിടയില്‍, സ്വാലിഹ് അല്‍ ജഅഫ്രാവി ഇസ്രായേല്‍ സായുധ സംഘത്തിന്റെ വെടിയേറ്റ് കൊല്ലപ്പെട്ടു. കെയ്‌റോവിലെ ശറമുശ്ശൈഖില്‍ രാഷ്ട്ര നേതാക്കള്‍ വെടിനിര്‍ത്തല്‍ പ്രഖ്യാപിച്ച് പിരിഞ്ഞ സന്ദര്‍ഭത്തിലായിരുന്നു ആ ദുരന്തം. 27 വയസ്സ് മാത്രമുണ്ടായിരുന്ന ആ യുവ പത്രപ്രവര്‍ത്തകന്റെ രക്തസാക്ഷ്യം, ഗസ്സയിലെ മാധ്യമപ്രവര്‍ത്തകരുടെ അപകടകരമായ ജീവിത സാഹചര്യങ്ങളെ വീണ്ടും ലോകത്തിന് മുന്നില്‍ കൊണ്ടുവന്നു.

എന്നാല്‍, സ്വാലിഹിന്റെ മരണം അവസാനമായിരുന്നില്ല. അദ്ദേഹത്തിന്റെ രക്തസാക്ഷിത്വം ഇസ്രയേലി കാപട്യത്തിന്റെ പ്രതീകമായി മാറി. അതുകൊണ്ടാണ് തുനീഷ്യന്‍ സ്‌കൂളുകളില്‍ മണിക്കൂറുകള്‍ക്കുള്ളില്‍ അദ്ദേഹത്തിന്റെ ജീവിതകഥ തങ്ങളുടെ സ്‌കൂള്‍ അധികവായനക്കുള്ള പാഠഭാഗങ്ങളായി മാറിയത്.

സ്വാലിഹ് അല്‍ ജഅഫ്രാവി ഒരു വാര്‍ത്താ റിപ്പോര്‍ട്ടര്‍ മാത്രമല്ല, നീതിക്കും സ്വാതന്ത്ര്യത്തിനും വേണ്ടി നിലകൊണ്ട ധീരതയുടെ പാഠപുസ്തകമാണ്. ലോകമെമ്പാടുമുള്ള പുതിയ തലമുറയ്ക്ക് മുന്നില്‍, ഭയമില്ലാത്ത മാധ്യമപ്രവര്‍ത്തനത്തിന്റെയും ഫലസ്തീന്റെ അചഞ്ചലമായ പ്രതിരോധത്തിന്റെയും ഉജ്ജ്വലമായ അധ്യായമായി അദ്ദേഹം എന്നെന്നും നിലനില്‍ക്കും, തീര്‍ച്ച.