മലിനമായ വെള്ളം മൂക്കിലൂടെ മസ്തിഷ്‌കത്തിലേക്ക് കയറുമ്പോഴാണ് അമീബിക് മസ്തിഷ്‌ക ജ്വരം ഉണ്ടാകുന്നത്. കേരളത്തില്‍ അടുത്ത ദിവസങ്ങളിലായി നിരവധി കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്.
അമീബിക് മസ്തിഷ്‌കജ്വരം വളരെ അപൂര്‍വമാണെങ്കിലും അത്യന്തം ഗുരുതരമായ രോഗമാണ്. ഇത് പ്രധാനമായും മലിനമായ വെള്ളം മൂക്കിലൂടെ മസ്തിഷ്‌കത്തിലേക്ക് കയറുമ്പോഴാണ് ഉണ്ടാകുന്നത്. കേരളത്തില്‍ അടുത്ത ദിവസങ്ങളിലായി നിരവധി കേസുകള്‍ റിപ്പോര്‍ട്ട് ചെയ്യുകയും കുറേ പേര്‍ മരിക്കുകയും ചെയ്തിട്ടുണ്ട്.
അമീബ തലച്ചോറില്‍ എത്തിക്കഴിഞ്ഞാല്‍ 5-10 ദിവസത്തിനുള്ളില്‍ രോഗലക്ഷണങ്ങള്‍ പ്രകടമാകും. രോഗം പെട്ടെന്ന് മൂര്‍ച്ഛിക്കുകയും കുറഞ്ഞ ദിവസങ്ങള്‍ക്കുള്ളില്‍ രോഗി മരിക്കുകയും ചെയ്യും. കൃത്യസമയത്ത് രോഗം കണ്ടെത്താന്‍ കഴിയാത്തതും മരണസാധ്യത വര്‍ധിപ്പിക്കുന്നു. രോഗം ബാധിച്ചാല്‍ 90-100 ശതമാനം വരെയാണ് മരണനിരക്ക്.
നെഗ്ലേറിയ ഫൗലേറി എന്ന അമീബ വിഭാഗത്തില്‍പ്പെട്ട രോഗാണു തലച്ചോറിനെ ബാധിക്കുമ്പോഴാണ് അമീബിക് മസ്തിഷ്‌ക ജ്വരം (അമീബിക് മെനിഞ്ചോ എന്‍സെഫലൈറ്റിസ്) ഉണ്ടാകുന്നത്. വെള്ളത്തിലെ ബാക്ടീരിയകളെയും മറ്റും ആഹാരമാക്കി ജീവിക്കുന്ന ഈ അമീബകള്‍ നമ്മുടെ ചുറ്റും ധാരാളമായുണ്ട്. വൈറസുകളെയും ബാക്ടീരിയകളെയും പോലെ ഏകകോശജീവിയായ ഇവ വലിയ അളവില്‍ തലച്ചോറില്‍ എത്തുമ്പോഴാണ് രോഗം ഉണ്ടാവുക. അമീബകള്‍ മൂക്കിലെ സൂക്ഷ്മമായ അസ്ഥിവിടവുകളിലൂടെ നേരിട്ട് തലച്ചോറില്‍ എത്തുകയും ഗുരുതരമായ അണുബാധയ്ക്ക് കാരണമാവുകയും ചെയ്യും.
അപ്രതീക്ഷിതമായി ഉണ്ടാകുന്ന കഠിനമായ പനി, സഹിക്കാന്‍ കഴിയാത്ത തലവേദന എന്നിവയാണ് പ്രധാന ലക്ഷണം. ഇതോടൊപ്പം, ഓക്കാനവും ഇടയ്ക്കിടെയുള്ള ഛര്‍ദിയും ഉണ്ടാകാന്‍ സാധ്യതയുണ്ട്. രോഗം ഗുരുതരമാകുമ്പോള്‍ സ്വബോധം നഷ്ടപ്പെടുകയും കഴുത്ത് ചലിപ്പിക്കാന്‍ ബുദ്ധിമുട്ട് അനുഭവപ്പെടുകയും ചെയ്യും.
നടുവേദനയും ഉണ്ടാകും. അപസ്മാരം വരാന്‍ സാധ്യതയുണ്ട്. ബോധക്ഷയം ഉണ്ടാവുകയും ചിലപ്പോള്‍ പരസ്പരബന്ധമില്ലാതെ സംസാരിക്കുകയും ചെയ്യാം. ഇത്തരം ലക്ഷണങ്ങള്‍ കണ്ടാല്‍ ഒട്ടും വൈകാതെ വൈദ്യസഹായം തേടണം.
അമീബിക് മസ്തിഷ്‌ക ജ്വരത്തിന്റെ ലക്ഷണങ്ങള്‍ കണ്ടുതുടങ്ങുമ്പോള്‍ സ്വയം ചികിത്സ നടത്താതെ എത്രയും വേഗം ആശുപത്രിയില്‍ എത്തണം. നിലവില്‍ ഈ രോഗത്തിന് ഫലപ്രദമായ മരുന്നോ ചികിത്സയോ ലഭ്യമല്ല. എങ്കിലും, ഫംഗസ് അണുബാധകള്‍ക്ക് ഉപയോഗിക്കുന്ന ചില മരുന്നുകള്‍ കൂട്ടിച്ചേര്‍ത്ത് രോഗികള്‍ക്ക് നല്‍കിവരുന്നു. രോഗത്തെപ്പറ്റിയുള്ള അറിവും ജാഗ്രതയുമാണ് പ്രധാനം.
പ്രതിരോധം
കെട്ടിക്കിടക്കുന്നതും വൃത്തിഹീനവുമായ ജലാശയങ്ങളില്‍ ഇറങ്ങുന്നത് പൂര്‍ണമായും ഒഴിവാക്കണം. പ്രത്യേകിച്ചും വേനല്‍ക്കാലങ്ങളില്‍ ഇത്തരം വെള്ളത്തില്‍ അമീബ പെരുകാനുള്ള സാധ്യത വളരെ കൂടുതലാണ്. ശരിയായ രീതിയില്‍ ക്ലോറിനേഷന്‍ നടത്താത്ത നീന്തല്‍ക്കുളങ്ങളിലും അമീബയുടെ സാന്നിധ്യം ഉണ്ടാകാം. അതിനാല്‍ സുരക്ഷിതമല്ലാത്ത കുളങ്ങള്‍ ഒഴിവാക്കുക.
വെള്ളത്തില്‍ കളിക്കുമ്പോഴോ കുളിക്കുമ്പോഴോ മൂക്കിലൂടെ വെള്ളം അകത്തേക്ക് കയറാന്‍ സാധ്യതയുള്ള സാഹചര്യം ഒഴിവാക്കണം. വെള്ളം മൂക്കിലൂടെ അകത്തേക്ക് കടക്കാതിരിക്കാന്‍ പ്രത്യേകം ശ്രദ്ധിക്കണം.
ശുദ്ധജലം മാത്രം ഉപയോഗിക്കുക. കുടിവെള്ളത്തിനും കുളിക്കാനും ദിവസേന ഉപയോഗത്തിനും സുരക്ഷിതമായ ഉറവിടം ഉറപ്പാക്കണം. വെള്ളക്കെട്ടുകള്‍, മലിന തടാകങ്ങള്‍, ശുദ്ധീകരിക്കാത്ത കിണറുകള്‍ എന്നിവയില്‍ കുളിക്കുന്നത് ഒഴിവാക്കുക. കണ്ണിലും മൂക്കിലും വെള്ളം കയറാതെ സൂക്ഷിക്കുക.
പൊതുകുളങ്ങളിലോ കുളങ്ങളിലോ മലിന തടാകങ്ങളിലോ കുളിക്കുന്നത് ഒഴിവാക്കുക. കിണറുകളിലോ കുഴല്‍ കിണറുകളിലോ കുളിക്കേണ്ടിവന്നാല്‍, വെള്ളം ക്ലോറിനേഷന്‍ ചെയ്തിട്ടുണ്ടോ എന്ന് ഉറപ്പാക്കുക. വെള്ളം കൂടുതല്‍ ചൂടുപിടിച്ച അവസ്ഥയില്‍ (30°C-ല്‍ കൂടുതല്‍) ദീര്‍ഘസമയം കുളിക്കുന്നത് ഒഴിവാക്കുക. കുടിവെള്ളത്തിലൂടെ ഈ രോഗം പകരില്ലെങ്കിലും വെള്ളം കുടിക്കുന്നിടത്തും ജാഗ്രത വേണം.
ശുദ്ധമല്ലെങ്കില്‍ വെള്ളം തിളപ്പിച്ച് കുടിക്കുക. ഫില്‍ട്ടര്‍/പ്യൂരിഫയര്‍ വഴി ശുദ്ധീകരിച്ച വെള്ളം കുടിക്കുക. കുടിവെള്ള സംവിധാനങ്ങള്‍, പൊതു ടാങ്കുകള്‍ മുതലായവയില്‍ നിന്ന് കുടിക്കുന്നതിനു മുമ്പ് ഉറവിടം സുരക്ഷിതമാണോ എന്ന് പരിശോധിക്കുക. മഴക്കാലം ഒഴിയുന്നതോടെ കുടിവെള്ളത്തിലൂടെയും പല രോഗങ്ങളും വ്യാപകമാവുമെന്നതിനാല്‍ വെള്ളക്കാര്യത്തില്‍ വലിയ ശ്രദ്ധ വേണം.
കിണറിലെ വെള്ളം പ്രശ്‌നമാണോ?
കിണറുകളിലെ വെള്ളം ശുദ്ധമാണോ എന്ന് ഉറപ്പുവരുത്തണം. ആവശ്യമെങ്കില്‍ ക്ലോറിനേറ്റ് ചെയ്യണം. മൃഗങ്ങള്‍, ഇലകള്‍, മാലിന്യങ്ങള്‍ എന്നിവ കിണറില്‍ വീഴാതെ സൂക്ഷിക്കുക. കുഴല്‍ കിണര്‍ ഉള്ളവര്‍ വെള്ളം നേരിട്ട് കുടിക്കാതെ ഫില്‍റ്റര്‍ ചെയ്യുക/ തിളപ്പിക്കുക. പൈപ്പും ടാങ്കും ശുചീകരിക്കുക. ഓവര്‍ഹെഡ് ടാങ്ക് മാസത്തില്‍ കുറഞ്ഞത് ഒരു പ്രാവശ്യം കഴുകി ക്ലോറിനേറ്റ് ചെയ്യുക.
ക്ലോറിനേഷന്‍ ചെയ്യേണ്ട വിധം
കിണറുകള്‍ക്ക്: ആദ്യം വെള്ളത്തിന്റെ അളവ് കണക്കാക്കണം. കിണറിന്റെ ആഴവും വ്യാസവും നോക്കി വെള്ളത്തിന്റെ ഘനമീറ്റര്‍ കണക്കാക്കാം. സാധാരണയായി ഒരു ഘനമീറ്റര്‍ വെള്ളത്തിന് 2-3 ഗ്രാം ബ്ലീച്ചിംഗ് പൗഡര്‍ (70% ക്ലോറിന്‍ ഉള്ളത്) ചേര്‍ക്കാം. ബ്ലീച്ചിംഗ് പൗഡര്‍ വെള്ളത്തില്‍ കലക്കി കിണറില്‍ ഒഴിക്കുക. പിന്നീട് നന്നായി കലങ്ങാന്‍ വെള്ളം ബക്കറ്റോ കയറോ ഇട്ട് ഇളക്കുക. കുറഞ്ഞത് 8 മണിക്കൂര്‍ വെള്ളം ഉപയോഗിക്കാതെ കാത്തിരിക്കണം.
ഓവര്‍ഹെഡ് ടാങ്കുകള്‍ക്ക്: 1000 ലിറ്റര്‍ വെള്ളത്തിന് ഏകദേശം 2-3 ഗ്രാം ബ്ലീച്ചിംഗ് പൗഡര്‍ വെള്ളത്തില്‍ കലക്കി ടാങ്കില്‍ ചേര്‍ക്കുക. 3-4 മണിക്കൂര്‍ കഴിഞ്ഞാല്‍ ഉപയോഗിക്കാം.
ശ്രദ്ധിക്കേണ്ടത്
ബ്ലീച്ചിംഗ് പൗഡര്‍ പുതിയതായിരിക്കണം. പഴകിയാല്‍ ക്ലോറിന്റെ ശക്തി നഷ്ടപ്പെടും. ആവശ്യമെങ്കില്‍ മാസത്തില്‍ ഒരിക്കല്‍ കിണറും ടാങ്കും ക്ലോറിനേറ്റ് ചെയ്യുക. ക്ലോറിനേറ്റ് ചെയ്ത ഉടനെ വെള്ളം കുടിക്കരുത്. 6-8 മണിക്കൂറിനു ശേഷമേ കുടിക്കാന്‍ ഉപയോഗിക്കാവൂ. വെള്ളത്തില്‍ അല്‍പം ക്ലോറിന്റെ മണം ഉണ്ടെങ്കില്‍ പോലും അത് സുരക്ഷിതമാണ്. അധികം ചേര്‍ത്താല്‍ വെള്ളത്തിന് രുചിയും മണവും മോശമാകും. അളവ് പാലിക്കുക.
അടച്ചിട്ട കിണറിലെ വെള്ളം
കിണര്‍ മുഴുവന്‍ അടച്ചിട്ടിരിക്കുമ്പോള്‍ വെള്ളത്തില്‍ നേരിട്ട് സൂര്യപ്രകാശം പതിക്കില്ല. സൂര്യപ്രകാശം കിട്ടുമ്പോള്‍ ചില രോഗാണുക്കള്‍ (ബാക്ടീരിയ, അമീബ, ആല്‍ഗ മുതലായവ) സ്വാഭാവികമായി നശിക്കും. അടച്ചുകിടക്കുന്ന കിണറിലെ വെള്ളം സ്ഥിരമായി ഇളക്കാതെ ഇരിക്കുമ്പോള്‍, വെള്ളം മന്ദഗതിയില്‍ നിശ്ചലമായി മാറി, ആല്‍ഗ വളര്‍ച്ച, ബാക്ടീരിയ/ അമീബ വളര്‍ച്ച, കിണറിന്റെ അടിയില്‍ പാളി രൂപപ്പെടല്‍ എന്നിവയ്ക്ക് സാധ്യതയുണ്ട്. വെയില്‍ പതിക്കുന്നത് വെള്ളത്തിലെ സൂക്ഷ്മജീവികളെ കുറയ്ക്കാന്‍ സഹായിക്കും.
കിണര്‍ മുഴുവന്‍ അടച്ചിടരുത്. വെളിച്ചവും വായുവും എത്താന്‍ ഭാഗികമായെങ്കിലും തുറന്നിരിക്കണം. മഴക്കാലത്തിനു ശേഷം കിണര്‍ വൃത്തിയാക്കി ക്ലോറിനേറ്റ് ചെയ്യണം. കിണര്‍ നിശ്ചലമായി അടച്ചിട്ട് ദീര്‍ഘകാലം വെച്ചാല്‍ വെള്ളം മലിനമാവും.
നിശ്ചലമായ വെള്ളത്തില്‍ ഓക്‌സിജന്‍ കുറയും, മൈക്രോബുകളുടെ വളര്‍ച്ച കൂടുതലാകും. വെള്ളം ഇളക്കുമ്പോള്‍ അടിഞ്ഞുകിടക്കുന്ന മാലിന്യം മുകളില്‍ വരും. പിന്നീട് നീക്കം ചെയ്യാന്‍ എളുപ്പമാകും. ഓക്‌സിജന്‍ കലക്കപ്പെടും. വെള്ളത്തിന്റെ ഗുണം മെച്ചപ്പെടും. അതുകൊണ്ട് ഇടയ്ക്കിടെ കിണറിലെ വെള്ളം ഇളക്കുന്നത് നല്ലതാണ്. ബക്കറ്റ് കൊണ്ട് വെള്ളം കോരുന്നത് ഗുണകരമാവുന്നത് അതുകൊണ്ടാണ്.
കിണര്‍ മുഴുവന്‍ അടച്ചിടരുത്. വെളിച്ചവും വായുവും എത്താന്‍ ഭാഗികമായെങ്കിലും തുറന്നിരിക്കണം. മഴക്കാലത്തിനു ശേഷം കിണര്‍ വൃത്തിയാക്കി ക്ലോറിനേറ്റ് ചെയ്യണം. കിണര്‍ നിശ്ചലമായി അടച്ചിട്ട് ദീര്‍ഘകാലം (ഉപയോഗിക്കാതെ) വെച്ചാല്‍ വെള്ളം മലിനമാവും.
വെള്ളം സുരക്ഷിതമാണോ എന്ന് മനസ്സിലാക്കാം
വെള്ളം സ്വച്ഛമാണോ? മങ്ങലോ നിറംമാറ്റമോ ഇല്ലെങ്കില്‍ നല്ലതാണ്. പച്ച നിറം/ ആല്‍ഗ വളര്‍ച്ച ഉണ്ടെങ്കില്‍ വെള്ളം സുരക്ഷിതമല്ല. കിണറ്റില്‍ ഇലകള്‍, കീടങ്ങള്‍, മാലിന്യം ഉണ്ടെങ്കില്‍ സൂക്ഷിക്കണം.
വാസനിച്ചുള്ള പരിശോധന
ശുദ്ധജലത്തിന് സ്വാഭാവികമായ രുചിയില്ല, മണവുമില്ല.
ദുര്‍ഗന്ധം, പുഴുങ്ങിയ മണം, കെമിക്കല്‍ പോലുള്ള ഗന്ധം ഉണ്ടെങ്കില്‍ വെള്ളം കുടിക്കാന്‍ പാടില്ല.
രുചി പരിശോധന
ചെറിയ തോതില്‍ രുചി നോക്കുക. കടുപ്പം, ഉപ്പുരസം, ഇരുമ്പിന്റെ രുചി, അപ്രതീക്ഷിത കയ്പ് എന്നിവയുണ്ടെങ്കില്‍ വെള്ളം മലിനമാണ്.
കുഴിയിടല്‍ പരീക്ഷണം
ഒരു സുതാര്യ ഗ്ലാസില്‍ വെള്ളം എടുത്ത് 30 മിനിറ്റ് വെക്കുക. അടിയില്‍ പൊടി, മണല്‍, മലിന കണങ്ങള്‍ അടിഞ്ഞാല്‍ ശുദ്ധീകരണം വേണം.
നുര പരിശോധന
വെള്ളം കുലുക്കി നോക്കുക. അസാധാരണമായി അധികം നുര ഉയരുന്നുവെങ്കില്‍ സോപ്പ്/ഡിറ്റര്‍ജന്റ് മലിനീകരണം ഉണ്ടായേക്കാം. വെള്ളം സ്വച്ഛമായി കാണുക, മണമില്ല, രുചിയില്‍ പ്രശ്‌നമില്ല എങ്കില്‍ സുരക്ഷിതം.
കാഴ്ച, മണം, രുചി നോക്കുന്നത് അടിസ്ഥാന പരിശോധന മാത്രമാണ്.
ശാസ്ത്രീയമായി വെള്ളം ശുദ്ധമാണോ എന്ന് ഉറപ്പിക്കാന്‍ ലബോറട്ടറി ടെസ്റ്റുകളാണ് ഏറ്റവും വിശ്വസനീയ മാര്‍ഗം. ഫിസിക്കല്‍, കെമിക്കല്‍, മൈക്രോബയോളജിക്കല്‍ പരിശോധനകളാണ് ശാസ്ത്രീയ പരിശോധനയുടെ പ്രധാന ഘട്ടങ്ങള്‍.
ജല അതോറിറ്റികളുടെ അംഗീകൃത ലബോറട്ടറികള്‍ (Kerala Water Authority, CWRDM, Kerala State Pollution Control Board),
Medical College / Private NABL accredited labs - കുടിവെള്ള ടെസ്റ്റുകള്‍ക്കായി സേവനം നല്‍കുന്നു. Field Test Kits (FTKs) ഗ്രാമ പഞ്ചായത്തുകള്‍ വഴിയും ലഭ്യമാണ്.
കിണര്‍ വെള്ളം
വര്‍ഷത്തില്‍ കുറഞ്ഞത് ഒരു പ്രാവശ്യം (മഴക്കാലത്തിനു ശേഷം) പരിശോധന നടത്തണം.
ബോര്‍വെല്‍/ഓവര്‍ഹെഡ് ടാങ്ക് വെള്ളം
രണ്ടു വര്‍ഷത്തില്‍ ഒരിക്കല്‍. വെള്ളത്തിന് നിറം/ഗന്ധം/രുചി മാറിയാല്‍ ഉടന്‍ പരിശോധന നടത്തണം.